Aintzirako abentura

Irakurmena. Literatura-testua.

AINTZIRAKO ABENTURA

Gau hartan ezin izan nuen lorik egin. Ilargi betea zegoen eta zerua izarrez josita, baina ni gero eta urduriago nengoen. Leku arraro haren irudiak jirabira ari ziren nire buruan. Ezin izan nuen gehiago itxaron eta aintzira esploratzera joatea erabaki nuen.

Errekaren alboko bidetik joan nintzen, aintzinaren ondora iritsi arte. Ikuspegia izugarria zen! Uretan sarturik, dinosauro erraldoi bat ikusi nuen, igerian. Lepo luze-luzea zuen eta hiru bat metrokoa zen, baina baketsua ematen zuen. 

Aintzinaren beste aldean, leize-zuloak zeuden tokian, argi gorrixkak ikusi nituen. Suteen argiak ziren. Beraz, Mundu Galduan gizakiak ere bizi ziren, ziur nengoen. Kanpamentura itzuli behar nuen, besteei nire aurkikuntzaren berri ematera!

Erreka ondoko bidetik bueltan nindoala, bat-batean, arnas hotsa sentitu nuen nire atzean. Jiratu eta odol guztiak ur bihurtu zitzaizkidan ikusi nuena ikusita: dinosaurorik krudelena eta arriskutsuena nuen segika. Tiranosaurus Rex bat zen! Korrika bizian hasi arren, piztiaren arnasa lepondoan sentitzen nuen. Gero eta hurbilago zetorren, Ia nire gainean zegoen!

Bat-batean, zulo sakon batera erori nintzen eta konortea galdu nuen. Neure onera etortzean, ez nuen ezer ikusi; hori bai, kirats nazkagarria sumatu nuen. Pospolo bat piztu nuen eta animalia batzuen gorpuak ikusi nituen inguruan. Argi zegoen: zulo hura dinosauroak harrapatzeko tranpa zen eta gizakiek egina zen, gainera.

Poliki-poliki zulotik atera nintzen. Tiranosauroa ez zegoen inguruan, baina ni oraindik zeharo izuturik nengoen eta, korrika bizian, kanpamenturantz abiatu nintzen.

Kanpamentua hutsik eta hankaz gora zegoen. Nire lagunen arrastorik ez. Pentsatzen saiatu nintzen, baina oso nekatuta nengoen eta ezin nuen pentsatu; beraz, lo-kuluxka bat egitea erabaki nuen, ondoren gauzak argiago ikusiko nituelakoan. Begiak itxi orduko, baina, ahots bat entzun nuen niri deika.

-Esnatu, adiskide!

Lordo John Roxton zen.

-Lord John! Zer gertatu da? Non daude besteak?

-Gizaki-tximinoek harrapatu dituzte -esan zidan Lord Roxtonek-.

Goizaldean, kanpamentuari eraso diote eta atxilotu egin gaituzte. Nik ihes egitea lortu dut eta armak hartzera itzuli naiz. 

-Askatu egin behar ditugu! -esan nuen kezkatuta-. Armak hartu eta goazen lehenbailehen gizaki-tximinoen herrixkara! 

Gizaki-tximinoen herrixkaren inguruetara iritsi ginen eta haitz baten atzean ezkutatu ginen. Handik, herrixka osoa ederki ikusteko aukera genuen. Sumerlee irakaslea zuhaitz bati lotuta zegoen, baina Challenger irakaslea ez nuen inon ikusten.

-Non dago Challenger, Lord John?

-Gizaki-tximinoen erregearekin dago, herrixkaren erdian. Begira! -erantzun zidan Lord Roxtonek. 

Bat-batean, gizaki-tximinoen erregeak eskua jaso zuen. Beste gizaki-tximinoek Sumerlee irakaslea hartu eta amildegi baten ertzera eraman zuten. Challenger irakaslea gizaki-tximinoen erregearekin hitz egiten ari zen, baina erregeak ezetz esaten zuen buruarekin.

-Begira, Malone! -esan zidan Lord Roxtonek oso urduri-. Sumerlee irakaslea amildegian behera bota behar dute!

Besterik esan gabe, biok tiroka hasi ginen. Tiro on batez, gizaki-tximinioen erregea hil  nuen. Orduan, gainerako gizaki-tximinoek ihes egin zuten zuhaitz artean ezkutatzera.

Challenger irakasleak lagun guztiak askatu zituen, eta Sumerlee eta bera guregana etorri ziren ziztu bizian.

Arthur Conan Doyle

Mundu Galdua (Moldatuta)

Hitzak

Lepondo: Garondoa, lepoaren atzealdea.

Kirats: Usain sarkor, higuingarria.

Lo-kuluxka: Lo harina.

Amildegi: Lurreko ebaki sakon eta aldapatsua.